जर-जर परल इनार
जिला सीतामढ़ी, प्रखण्ड सोनबारसा, पंचायत पिपरा परसाईन, गांव पकरिया। उहां वार्ड नम्बर नौ में इनार हई। जेकर गोलम्बर टूट गेल हई अउर घेराव भी नीच हो गेल हई। लेकिन अभियों ओई इनार से लगभग पच्चीसों लोग घरूआर करई छथिन।
उहां के लोग सुन्दर कला देवी, राज नारायण साह कहलथिन कि उ इनार बुधु साह के दरवाजा पर हई। लेकिन इ सार्वजनिक इनार हो गेल हई। इहां चापाकल के दिक्कत हई, जेई कारण हम सब इनारे के पानी से कपड़ा, बर्तन, माल-जाल धोई छी। हर समय उ इनार चालूये रहई छई। पुरा टोला के लोग स्नानों करई छई। सिर्फ घरेलू काम अउर पिये के लेल दोसरा के चापाकल से पानी ले जाई छी। ऐई इनार के पानी बहुत अच्छा हई। थोड़ा मरम्मती करा देतियई अउर पानी के निकासी के कोई साधन होतियई त यई इनार पर गंदगी न फैलतियई अउर काम करे में भी कोई दिक्कत न होईतियई।
मुखिया देवल साह कहलथिन कि इनार मरम्मती के लेल कार्ययोजना में डालले छी। पास हो जतई तब इनार के मरम्मती करवा देवई।
प्रखण्ड विकास पदाधिकारी श्री कांत ठाकुर कहलथिन कि पंचायत के विेकास संबंधित कार्य के लेल मुखिया के फण्ड में रूपईया जाई छई। उहे सोच समझ के काम करईथिन।