आबादी के लेल हो रहल सर्वे

जिला सीतामढ़ी, प्रखण्ड रीगा, पंचायत भवदेपुर, गांव चण्डिया। उहां के आंगनवाड़ी सेविका सब अपना-अपना पोषक क्षेत्र के अंदर सर्वे करई छथिन। उ सर्वे कयला हो रहल हई इ बात सर्वे करे वाला के भी पता न हई।
गांव के लोग मैरूदीन अउर साबूदीन कहलथिन कि हमरा सब के जनगणना फेर से हो रहल हई। हमरा सब के ऐई से की फायदा होतई से पता न हई? सेविका मंजू देवी कहलथिन कि सेन्टर चलयला के बाद ही हम सर्वे करे जाई छी। एई सर्वे में एको आदमी न छुटे के चाही। फाॅर्म में नाम जाति उमर सही-सही लिखे के हई। उ सर्वे सरकार कयला करा रहल छथिन उ हम न बता सकई छी?
समेकित बाल विकास परियोजना के पदाधिकारी अंजू कुमारी कहलथिन कि इ सर्वे जनसंख्या पता करे के लेल हो रहल हई। जेईमें रीगा प्रखण्ड के महिला, पुरूष, बच्चा सब के अलग-अलग आंकड़ा निकाले के हई। 31 जुलाई तक ही काम पुरा करे के रहलई। लेकिन पुरा न होयला पर आठ दिन बढ़ा देल गेलई। अब पुरा आंकड़ा बहुत जल्दी सरकार के भेजल जतई।