आन्दोलन करै कै दिहिन चेतावनी

जिला अम्बेडकरनगर, ब्लाक भीटी। हिंआ तहसील पै भारतीय किसान यूनियन कै कार्यकर्ता कइयौ समस्या का लइके 9 मई का एस.डी.एम का ज्ञापन शौंपिन।
ब्लाक अध्यक्ष पवन कुमार सिंह कै कहब बाय कि बैंक आंफ बड़ौदा मा किसान अउर वृध्द मनइन खातिर अलग से काउन्टर नाय बनत बाय। न ही खाता खोलय कै उचित व्यवस्था बाय। भीटी ब्लाक मा खण्ड विकास अधिकारी कै कुर्सी कइयौ दिन से खाली पड़ी बाय। जेकरे कारन योजना कै लाभ सब पात्रन का नाय मिल पावत बाय।
जीत बहादुर अरुण पाण्डेय सरोज कुमारी संगीता देवी लालावती यै सब कै कहब बाय कि गर्मी शुरु हुवय से पहिले विजली विजली कै ट्रांसफार्मर ओवरलोड बाय वका ठीक करावै कै मांग करे रहेन। लकिन कउनौ सुनवाई नाय भै। नहर व माइनर मा पानी न हुवय से अउर नलकूप ठीक न करावै से सिंचाई मा काफी दिक्कत हुवत बाय। यहि सब समस्या कै ज्ञापन एस.डी.एम. का शौंपिन। अउर कहिन कि जल्दी समस्या कै निस्तारण न किया जाये तौ आन्दोलन छेड़ा जाये।
एस.डी.एम. एसपी सिंह बताइन कि सब समस्या कै जांच करायके समस्या दूर कराय जाये।