आधार कार्ड के बहाना वसूला गा रूपिया वापस

जिला बांदा, ब्लाक नरैनी, गांव करतल, मजरा बाबूपुर। या गांव मा 7 नवम्बर 2014 का कैम्प लगा के आधार कार्ड बनवावैं मा गांव के लोगन अउर आधार कार्ड बनावैं आई टीम के बीच हगांमा मच गा। मामला के जानकारी पउतै नरैनी एस.डी.एम. मउके मा पहुंचे अउर आधार कार्ड बनावै वाली टीम से रूपिया वापस करा के मामला शांत करिन। साथै आधार कार्ड बनावैं मा रोक लगा दिहिन।
बाबूपुर गांव के कुवरिया, रामबाई अउर प्रेमाबाई बतावत हैं कि हमरे गांव के प्राइमरी स्कूल मा 7 नवम्बर 2014 का आधार कार्ड बनावै तीन लोगन के टीम अजयगढ़ (मध्य प्रदेश) से आई रहै। उंई बीस-बीस रूपिया हर मड़ई से लइके आधार कार्ड बनावैं लाग। जबैकि कैम्प लगा के आधार कार्ड निषुल्क बनत है। या बात का लइके हंगामा होइगा अउर नरैनी एस.डी.एम. एस.ओ. मउके मा आ गे। तबै मामला शांत भा अउर आधार कार्ड बनावैं मा रोक लाग गे। अब पता नहीं हम लोगन के आधार कार्ड बनिहैं या नहीं।
वार्ड नम्बर 14 के वार्ड सदस्य सियासखी का मनसवा रामसुहावन कहत है कि गांव मा आधार कार्ड बनावैं वाली टीम अजयगढ़ से आई रहै। उंई 16 लोगन के निर्वाचन पहंचान पत्र जमा करिन। आधार कार्ड बनावैं खातिर रूपिया लें मा हंगामा मच गा। नरैनी एस.डी.एम. आ गे बयालिस लोगन के लिस्ट बना के रूपिया वापस कर गे है।
नरैनी तहसील के एस.डी.एम. धीरेन्द्र कुमार कहिन कि जउन टीम आधार कार्ड बनावै आई रहै वहिका दुबारा से आधार कार्ड बनावैं का बोलावा गा है। अगर वा टीम अई तौ ठीक है नहीं तौ बांदा जिला से टीम टीम बोला के आधार कार्ड बनवाये जइहैं।