जरो परो समान
इस्लामिय स्कूल के पास। एते 19 अक्टूबर 2014 खा शाम 6 बजे मोहम्मद नजर के घर में आगी लग गई। जीमें लाखन को समान जर के राख हो गओ हे। जीखो मुआयना करन लेखपाल करन गओ हतो।
मोहम्मद नजर उर्फ लम्मरदार ने बताओ कि में कपड़ा सिलें को काम करत हों, शाम के मेने ऊ कमरा के गेट बन्द कर दये। ऊखे थोई देर बाद देखो तो पूरे कमरा में धुआं-धुआं हतो। कमरा में आगी लागे से ऊमें धरो समान तखत कपड़ा इन्वाटर के साथे आदमियन के सिले वाले कपड़ा जर के राख हो गये हे। जीमें मोओ दो लाख को नुक्सान भओ हे। आगी लागे पे हमने 100 नम्बर में फोन करो हतो। जभे तक मशीन आई हती, तभे तक मोहल्ला के आदमियन की सहायता से हमने आगी बुझा लई हती। ईखी दरखास हमने महोबा कोतवाली में दई हे। ईखो मुआयना करन भी लेखपाल आये हते।
महोबा कानून गो कालूराम ने बताओ कि ऊखी रिपोर्ट मिल गई हे। रजिस्ट्रर में चढ़ा के हमने शासन खा भेज दई हे। ओते से जांच के बाद पता चलहे कि मुआवजा मिलहे कि नई। अगर शासन केती से मुआवजा आहे तो मिल जेहे।