बसोरिया थाना आई रहै
जिला बांदा, ब्लाक नरैनी, गांव पौहार मजरा देवखेरा अउर महुआ ब्लाक का गांव बनसखा। देवखेरा के बसोरिया अउर बनसखा के संगीता बतावत हैं कि पड़ोसी उनके साथै मारपीट करिन हैं। दूनौ का मामला पुलिस तक पहुंचा। पुलिस एक मामला मा दूनौ पक्षन का समझौता करा दिहिस है।
बसोरिया बतावत है-“7 जुलाई 2013 का प्रधान छेदी लाल यादव से पानी भरैं का लइके लड़ाई भे है। प्रधान यतनी लड़ाई का लइके वहै दिन बच्चा खां के लड़का रमजा खां का लिवा के मोरे घर मा घुस के गाली गलौज करिस। या समस्या के रपट बदौसा थाना मा लिखाये हौं।” प्रधान का कहब है कि कउनौ लड़ाई नहीं रही आय। यहिके लड़ाई दुसरे मड़इन से भे है। मैं दूनौ पक्षन का समझौता बदौसा थाना मा करा दीने हौं। या बात बतावै मा बदौसा थाना के एस.ओ. भी रहैं। अगर तब भी दूनौ पक्ष लड़ाई करिहैं तौ कड़ी कारवाही कीन जई।
यहिनतान बनसखा के संगीता बतावत है-“मोर मनसवा जयकरण अउर ससुर गजराज के साथै मारपीट कीन गे है। या मारपीट 15 जुलाई 2013 का गांव के राजाराम अउर राम बाबू करिन हैं। एक साल पहिले भी इं लोग मोर मनसवा का मार चुके हैं।”
राजाराम बताइस कि मोर छेरी संगीता के करौंदा चर लिहिन। यतने मा जयकरण गाली दें लाग। मैं मना करेंव तौ संगीता बीच बचाव करैं लाग या मारे मामला अउर बढ़गा। दारू पियैं अउर मारपीट करैं का आरोप लगा के संगीता लड़ाई बढ़ावैं चाहत है।
खुरहण्ड चैकी के दरोगा मथुरा चैबे का कहब है कि अबै तौ 151 के धारा लाग है। डाक्टरी रिपोर्ट आवैं अउर जांच के हिसाब से आगे कारवाही कीन जई।