जिला अम्बेडकरनगर, ब्लाक भीटी, गाँव खजुरी हियाँ 26 अप्रैल का आंधी आवै से ग्यारह हजार पावर कै तार टूट गए।जेसे इक्कीस साल कै अनूप शौच के ताई गए अउर तार मा चिपक गये।करंट लागै से मउत होइगै। वहीँ बिजली विभाग कै कहब बाय कि घटना कै जानकारी नाय बाय।
शुभम मृतक कै साथी कै कहब बाय कि जब दुईनौ जने सौच से आवत रहेन वै दूसरी तरफ रहे अचानक तार पै पहुच गये अउर जलै लागे। तब हम भाग के जाय के घरे बतायन।तब बांस से सब छोड़ाइन।
अमरनाथ मृतक के पिता कै कहब बाय कि केहू जाँच करै नाय आय। अनुराग गोस्वामी कै कहब बाय कि लाइन आवाथै तौ डर बना रहाथै कहूँ शार्ट न होय जाय अउर आगि लागी जाय।
प्रधान सुभाष वर्मा कै कहब बाय कि तार बहुत पातर जोड़ाथे समय समय पै जाँच नाय करते।आंधी आवै से कहूँ टच भा अउर कटिके गिरगा।केहूका जानकारी रही नाय कि तार गिरा बाय जेसे हादशा भा।
गयादीन जेई महरुआ पावर हाउस कै कहब बाय कि अगर तार जर्जर रहा तौ सूचना दिये का रहा। सूचना मिली नाय रही नाही तौ जाँच हुवत। स्टीमेट बना बाय जाँच कीन जाये। बिभाग से जवन मुआवजा मिले दीन जाये।
रिपोर्टर- संगीता अउर प्रियंका
04/05/2017 को प्रकाशित
