अम्बेडकरनगर के रायगंज के निवासियों के दिलो में दौड़ी है ख़ुशी की लहर

जिला अम्बेडकरनगर, ब्लाक भीटी, गाँव रायगंज के ग्रामसभा रायगंज के मजरा डढ़वा मा मनई के दिल मा ख़ुशी कै लहर दौड़ गए बाय अउर दौरे भी काहे ना, इनके गाँव मा घर घर शौचालय जवन बनत बाय।
कलावती कै कहब बाय कि एक हप्ता पहिले शौचालय बनिके तैयार भए। नहाय कै जगह नाय रही तौ सब एहि मा नहाथे अबहीं शौचालय के ताई नाय इस्तेमाल कीन जात। हमैं ख़ुशी बाय कि शौचालय बनि जात बाय।आँख से कम देखाथै। शिवपूजन केसवानी कै कहब बाय कि प्रधान के तरफ से सारा सामान मिलाथै हमरे सबका कुछ लावै का नाय परत। लगभग सात सौ ईटा लागा थै शौचालय बनवावे मा।
दिलीप कुमार कारीगर कै कहब बाय कि एक मीटर चौड़ा एक मीटर गहरा डबल गड्ढा खोदा जाथै।डबल गड्ढा एसे खोदा जात बाय कि एक भर जाय तौ दूसर इस्तेमाल करै।
अजीत कुमार के कहब बाय कि हमैं ख़ुशी बाय कि हमरे सबके घर मा शौचालय बनत बाय अब बाहर न जाय का परे। अमरनाथ कै कहब बाय कि घर घर शौचालय बनै से गर्भवती मेहरारू के ताई बढ़िया भए बाय। गर्भवती मेहरारू बार बार बाहर जाय के डर से खाना नाय खातिन जेसे बच्चा अउर जच्चा दुईनौ पै असर पराथै।
उदय प्रताप सिंह प्रतिनिधि कै कहब बाय कि एक गड्ढा बीस साल तक चलाथै। खुली बैठक मा एहि गाँव के चयन भा रहा अउर घर-घर शौचालय बनत बाय।चौदह सौ आबादी मा दुई सौ छह शौचालय पास भा बाय।

रिपोर्टर- संगीता अउर प्रियंका

27/03/2017 को प्रकाशित