जिला चित्रकूट, ब्लाक मानिकपुर, गांव बसिला हिंया 15 साल पहिले सड़क बनवाई गें रहै पै चार साल या सड़क बिलकुल जर्जर हालत मा हवै। चार साल मा सड़क बनवावै खातिर कइयौ दरकी कहा गा हवै। पै कउनौ सुनवाई नहीं भे आय ।
टैंम्पो चलावे वाला संदीप कुमार बताइस कि टैंम्पो चलावे मा बहुतै परेशानी होत हवै यहै कारन पैदल जाये का पड़त हवै। कृष्ण दत्त का कहब हवै कि हम भौरी के कृषक इंटर कालेज मा पढ़े जात हन। सड़क ख़राब होय के कारन हमार साइकिल पन्चर होइ जात हवै।
ललिता, कलावती अउर कल्लू कुशवाहा का कहब हवै कि सड़क ख़राब होय से गाड़ी पलट जात हवै। बरसात के महीना मा तौ ज्यादा परेशानी होत हवै। टैंम्पो वाले बहुत नींकतान टैम्पो चलावत हवै। सांसद एक महीना पहिले से गिट्टा डलवा दिहिस हवै पै काम कुछौ नहीं भा आय। 15-20 गांवन के मड़ई यहै सड़क से निकलत हवै। प्रधान प्रतिनिधि दीपू सिंह का कहब हवै कि पिछले साल डी.एम.हिंया आये रहै तौ कहिन रहै कि 10-15 दिन के भीतर काम शुरू होइ जई। पै तक सड़क ख़राब पड़ी हवै ।
सांसद प्रतिनिधी सुशील द्विवेदी का कहब हवै कि प्रधानमंत्री सड़क रोजगार योजना के तहत 7 किलोमीटर सड़क बनावे का बजट मिल गा रहै। सांसद शिलान्यास करिहैं तौ सड़क बने का काम शुरू होइ जई।
रिपोर्टर- नाजनी रिजवी और सहोद्रा
20/03/2017 को प्रकाशित
