अन्ना जनवरन से फसल होत बरबाद

जिला महोबा, ब्लाक कबरई, गांव छांनी कला। अन्ना जानवरन के कारन आदमियन की पूरी फसल बरबाद होत हे। जीसे पचास आदमियन ने 20 जुलाई खा कबरई थाना में दरखास दई हे। आदमियन से जानवर बधवायें की मांग करी हे।

गांव के महेन्द्र, बाबू, रामशरण ओर देवेन्द्र कहत हे कि हमने अपनी खेती में तिल उड़द ओर मूंग की फसल बोई हती जोन ऊ सब जाम गई हे। गांव के आदमी अपने जानवर छोड़ दये हे। खेत से निकरत हे ओर खात भी हे। पूरी फसल बरबाद होत हे। हम लोग मना करत हे तो आदमी नई मानत ओर लड़ाई करें खा तैयार हो जात हे। एई से कबरई थाना में दरखास दई हे। जीसे आदमी अपने जानवर बांध लेय। दई दरखास में लिखो की गांव के अस्सी प्रतिशत जानवर हमने कह के बधवा दये हे। बीस प्रतिशत आदमी अपने जानवर नई बांधत हे। अगर जे सब जानवर न बधहें तो जोन बधें हे जानवर ऊ भी आदमी छोड़ देहे।

कबरई थाना के एस.ओ. चंचल यादव ने कहो की दरखास आई हती। हमने सिपाही खा भेज दओ हे। जीखे जानवर खुला हे तो बधवां दये जेहे।