अधूरो खुदो परो कुआं, नई होत सुनवाई

गेंदारानी बताउत समस्या

जिला महोबा, ब्लाक चरखारी, गांव सूपा। एते गयाप्रसाद पुत्र मतैया के नाम कुआं बुन्देलखण्ड पैकेज के तहत 2009 में खुदो हतो। जीखो काम अभे तक पूरा नई भओ हे। जीसे आदमियन ने 13 फरवरी 2015 खा डी.एम. खा दरखास दई हे, ओर कुआं को पूरा काम करवाये की मांग करत हे।
गयाप्रसाद की ओरत गेंदारानी ने बताओ कि मोये आदमी के नाम कुआं पास भओ हतो। जीखी एक किस्त को रूपइया मिलो हे, ओर पांच फुट गड्ढा खुदो हे। आदमी की कैंसर के बिमारी के कारन मोत हो गई हती। ऊखे बाद कोनऊ कुआं देखन नई आओ हे, ओर न भीतर से बधंवाओ हे। जीसे कुआं मे मिट्टी गिरे के कारन पुरो जात हे। मोये छोट्-छोट् बच्चा हे। मे कुआं खा नई बंधवा सकत हों। जभे खुदवाई भई हे तो बंधवाये खा चाही। खेती की सिंचाई मे लाभ मिल सके।
लघु सिंचाईं विभाग के अधिषाशी अभियन्ता ने बताओ कि ऊं कुआं के बारे मे मोये जानकारी नइयां। अभे दरखास आई हे जांच कराई जेहे। जांच के बाद कछू बता सकत हे का मामला हे।