तहसील में दिखाउत दरखास
जिला महोबा, ब्लाक जैतपुर, गांव बम्हौरी खुर्द को मजरा दरयाव सिंह का खोड़ा। ई खोड़ा खां बसे पचासन साल हो गये हे, पे बिजली आज तक नई पोंहची आय। जीसे आदमियन ने 25 जुलाई 2013 खा कुलपहाड़ तहसील में दरखास दई हें।
महेन्द्र सिंह, ओमप्रकाश, सतेन्द्र ओर भारत सिंह ने बताओ कि हमाये गांव खा बसे पचास साल से ज्यादा हो गये हे, पे आज तक बिजली नई आई आय। हमाई जिन्दगी तो जेसे-तेसे कट गई हे, पे अब हमाये बच्चन को भविष्य बिगरो जात हे। काये से अब के बच्चा बिना बिजली के पढ़ाई नई करत आय। एई से पांच सौ की एमरजेन्सी लाइट बच्चन की पढ़ाई के लाने लाये हें। पे बिना बिजली के ऊ भी बेकार हे। काय से चार दिन से ज्यादा नई जलत हे ओर चार्ज कराये खे लाने कुलपहाड़ जाने परत हे। एई से हम चाहत हे कि हमाये खोड़ा में भी बिजली आ जाय तो नींक हो जेहे।
प्रधान जयचन्द्र ने बताओ कि अभे पांच महीना पेहले सांसद ओर विधायक खा दरखस दई हती, तो ऊं कहत हते की बिजली लगवा दई जेहे।
बेलाताल के विजली विभाग के एस.एस.ओ बलबीर सिंह ने बताओ कि ओते राजीव गांधी विद्युती करण योजना के तहत दिसम्बर 2013 तक विजली लगवायें को काम शुरू करा दओ जेहे।
