सरकारी गल्ला से लदो पकरो आटो

तहसील में करत हंगामा
तहसील में करत हंगामा

 

गल्ला से लदो आटो
गल्ला से लदो आटो

। एते 27 जनवरी 2014 खा कोटेदार शिवलाल आटो में गल्ला भरके बेंचन जात हतो। ईखी सूचना गांव वालेन ने कोतवाली में देके आटो पकराई हे। 28 जनवरी 2014 खा तहसील में एस.डी.एम. के न मिले से गांव के आदमियन ने हंगामा करो हे।
गांव के लाल सिंह, हुसैन अली, बबलू यादव, अशरत अली ओर रामसजीवन ने बताओ कि कोटेदार शिवलाल बीस साल से कोटा चलाउत हे। तभई से गल्ला नई देत हे। ईखी दरखास हमने केऊ दइयां डी.एम. ओर एस.डी.एम. खा दई हे, पे हमाई कोनऊ सुनवाई नई भई हे। 27 जनवरी 2014 खा आटो में 4 कुन्तल गेंहू ओर 2 कुन्तल चावल भर के बेंचन जात हतो। ईखी सूचना हमने महोबा कोतवाली में दई हे। पुलिस ने आटो ओर ड्राइवर खा पकर लओ हे।
कल्लू के राशन कार्ड संख्या (251442) आशाराम के राशन कार्ड संख्या (136005) हुसेन के राशन कार्ड संख्या (136031) चुनाई के राशन कार्ड संख्या (136100) हे। ऊं सब ने बताओ कि हमाये राशन कार्ड 2006-7 के बने आय। राशन कार्ड में गल्ला तो दूर एकऊ दइयां मिट्टी को तेल तक नई दओ हे। गांव में केऊ दइयां आदमियन के राशन कार्ड तक फाड़ दये हें। हम गरीबन खा सरकारी सुविधा को लाभ नई मिलत हे, ओर न कोनऊ सुनवाई होत हे। कोतवाली के एस.एस.आई. भास्कर मिश्रा ने बताओ कि हमने एस.डी.एम. खा दरखास भेज दई हे। जांच के बाद मुकदमा लिखो जेहे।
जिला पूर्ति विभाग के क्षेत्रिय अधिकारी लखन राजपूत ने बताओ कि जांच करें में पता चलो हे कि ऊ गांव के कोनऊ बसोर जाती के घर में शादी हती। ओई गांव के 10-12 आदमियन के राशन कार्ड को गल्ला लेके जात हतो। हम जांच के रिपोर्ट डी.एम. खा भेज देबी। ओई कोटेदार के ऊपर कारवाही करहें।