कमिश्नर के औरत बांटिस सामान

जिला बांदा, तहसील नरैनी। हेंया 11 अप्रैल का सुबेरे 10 बजे से शाम 6 बजे तक लोगन के लाइन लाग रहै। पूछैं मा पता लाग कि कमिश्नर वेंकटेश्वर लू के औरत हम गरीब लोगन का मच्छर दानी अउर स्कूल के बच्चन का पानी के बाटल दें आवत है। यहिसे हमका लेखपाल बुलाइन हैं, पै सुबेरे से भूखे पियासे बइठे बइठे 2 बज गा अबै उनका कउनौ पता निहाय।
दुपहरी के 3 बजे उंई आई अउर स्कूल कि लड़की खूबै धूमधाम से नाच गाना के साथ उनका स्वागत करिन। जेहिमा नरैनी तहसील के सब अधिकारी भी शामिल रहैं। कमिश्नर के औरत बच्चन का पढा़ई लिखाई अउर भी हुनर सीखैं के बात कहिके उनका हौंसला बढ़ाइन अउर पानी के बोतल दिहिन। साथै सौ गरीब लोगन का अपने हाथ से फल अउर मच्छर दानी बांटिन।
उनका कहब रहै कि मोहिका बच्चन के हौंसला बढ़ावै अउर गरीबन के मद्द जइसे के काम मा बहुतै खुशी मिलत है। या मारे हर जघा जा के मैं लोगन से मिलत हौं अउर उनका हौंसला बढ़ावत हौं। जेहिका पाके लोग बहुतै खुश भे, पै बहुतै लोग या भी कहत रहैं कि एक मच्छर दानी खातिर पूरा दिन घर का काम छोड के भूखे पियासे बइठैं का परा है।

रिपोर्टर: गीता