आखिर खतम भओ जनता खा इन्तजार

मतदान में पछाऊं न हती ओरतें
मतदान में पछाऊं न हती ओरतें

जिला महोबा, ब्लाक पनवाड़ी, चरखारी, जैतपुर ओर कबरई। ई ब्लाकन खे हर गांव में लोक सभा चुनाव खा शोर बोहतई जोरन पर हतो। जीमे हर गांव को आदमी वोट डारे खे इन्तजार में हतो। आखिर 30 अप्रैल 2014 खा आदमियन खा जा इन्तजार खतम हो गओ।
अण्वारा गांव की हेमलता ओर वहीदा ने बताओ कि हम खा लागत हतो कि कभे 30 अप्रैल आहे ओर हम आपन कीमती वोट भाजपा से प्रधान मंत्री पद के उम्मीदवार मोदी खा डारबी।
महुआ गांव के कृपाल बताउत हे कि हम मोदी खा आपन वोट देय चाहत हें। काय से एसी बढ़त मंहगाई में अगर मोदी खे सरकार बन जेहे तो हम किसानन खा कछू सुविधा जरूर कराहे। जहां एक केती आदमी मोदी खे सरकार बनाये चाहत हें। ओतईं कछू आदमी पेहले गांव खा विकास बाद में वोट डारे खे बात कहत हते। ऊषा, आशारानी ओर जमुनिया ने बताओ कि हम अनपढ़ हें। हम खा पतो नइयां कि काहे में वोट डारें। हमखा तो लागत हे कि जोन ई दइयां सरकार ने नोटा को बटन बना दओ हे। ओई खा जा के दबा देबी। काय से जभे तक वोट नई परे हते। तभे ते नेता घरन-घरन जाके वोट मांगे खा हाथ जोरत हते, ओर कहत हते कि ई दइयां वोट डारे वाले आदमियन खा जलपान कराओ जेहे, पे एते पानी भी पिये खा नइयां।