जिला चित्रकूट ब्लाक मऊ गांव खोहर पुरवा छतनपुर हिंया के सुनीता का आरोप हवै कि एक साल का प्राथमिक स्कूल मा खाना बनावै का रूपिया 12 हजार नहीं मिला आय। यहिके दरखास तहसील दिवस मा 19 मई 2015 का दीन गा हवै।
हिंया के सुनीता का कहब हवै कि मैं प्राथमिक स्कूल मा खाना बनावत रहन पै मोहिका एक साल का 12 हजार रूपिया नहीं मिलत आय यहिसे मैं बहुतै परेशान रहत हौं कहें से कि मैं आपन पूरा घर का काम धंधा छोड़ के स्कूल मा जाके खाना बनावत हौ। अउर कुछौ घर का खर्चा चलै पै वहव नहीं मिलत आय हेड मास्टर विशेषानंद से कहित हवै तौ वा कहत हवै मैं नहीं जानत हौ आपन जाके पता करो। हेडमास्टर विशेषानंद का कहब हवै कि सरकार कइती से रूपिया नहीं आवा आय। तहसीलदार कतवारूराम का कहब हवै कि हमार पास दरखास आई हवै तौ जांच करवा के खाना का पइसा देवा जई अउर कारवाही कीन जई।