जिला चित्रकूट,ब्लाॅक कर्वी अउर मानिकपुर के सप्लाई नल मा या समय पानी नहीं आवत हवै। मड़ई पानी खातिर बाल्टी, डिब्बा लीने हिंया हुंवा घूमत फिरत हवै।
कर्वी मुहल्ला भरतपुरी के रहै वाले गोलू अउर जुबैदा का कहब हवै कि सप्लाई नल मा 10 जून से पानी नहीं आवत हव। इनतान के गर्मी अउर धूप मा पानी खातिर भटकत फिरत हन। जल संस्थान वाले बिल तौ बराबर भेजत हवै पै सप्लाई नल मा पानी नहीं देत हवै।
मानिकपुर ब्लाक, मुहल्ला महाबीर नगर शिवनगर अउर इन्द्रा नगर मा भी सप्लाई का यह हाल हवै।
महाबीर नगर मुहल्ला के राम स्वरूप इन्द्रा नगर के उदित अउर वार्ड सदस्य संतोष कहिन कि 26 मई से सप्लाई नल मा पानी नहीं आवत हवै। एकै हैण्डपम्प लाग हवै। वा पानी नहीं देत हवै। यहिसे मड़ई बूंद बूंद पानी का तरसत हवै। सप्लाई नल मा पानी आवै खातिर जल संस्थान मा 4 जून का लिखित दरखास दीन गे हवै।
मानिकपुर जल संस्थान के जेई श कांत का कहब हवै कि बिजली नहीं रहत आय। या कारन सप्लाई नल मा पानी नहीं आवत हवै।
कर्वी जल संस्थान के सहायक अभियन्ता डी. एम. तिवारी कहिन कि लाइन खराब हवै। वा बनत हवै। बन जई तौ सात दिन के भीतर पानी आवै लागी।
रिपोर्टर – तबस्सुम और सुनीता
