खबर लहरिया बुंदेलखंड महोबा जिले के भटेरवा खुर्द में टूटी पुलिया , प्रधान के पास नहीं है बज़ट

महोबा जिले के भटेरवा खुर्द में टूटी पुलिया , प्रधान के पास नहीं है बज़ट

जिला महोबा, गांव भटेवरा खुर्द में पुल टूट्बे के मारे आदमियन को छह किलो मीटर घूम के अपने खेत पे जाने परत।
आदमियन को आरोप हे के केऊ बार आदमियन से बनवावे के लाने कई लेकिन बे सुनत नईया। और प्रधान को कबो हे के हमे पास पोलिया बनबाबे के लाने बजट नईया।
जगदीश ने बताई के पुलिया टूटबे से हम ओरन को भोत परेशानी हे। आदमी शौच के लाने जात तो गिर परत। सो कनऊ को हाथ टूटत तो कोनऊ को पांव टूटत एसे जात शौच के लाने और निकर नई पात न कोनऊ बाहन टेक्टर बैलागाडी कछु नई निकर पात।
सब इतेई से निकरत ते इते से बागोल, रमपुरा, हे उते घूम के जाने परत। इते जो खेत हे भटेवरा वालेन के उने भोत परेशानी हो रई।
अबे सिचाई को काम चल रओ तो आदमी भोत परेशान हो रए। उते कोनऊ गाड़ी टेक्टर नई निकर पा रए तो आदमी अपनी मुड़ी पे रख के ले जा रए सिचाई को साधन।
प्रधान गौरी शंकर ने बताई के ज्यादा पानी बरसबे के मारे पुलिया टूट गई जी से सब आदमी परेशान हो रए। लेकिन ग्राम सभा में तो इतनो रुपईया हे नईया।
काय के बामे कम से कम बीस पच्चीस लाख रुपईया लग हे बनबाबे में। और बदिया बनबाबे के लाने भी कम से कम पच्चीस तीस लाख रुपईया लग हे। जाके मारे बो भी नई बन पा रई।

रिपोर्टर- श्यामकली

03/11/2016 को प्रकाशित