जिला चित्रकूट, ब्लाक रामनगर, गांव इटवा। 6 अगस्त का डाकू ललित पटेल पुलिस मुठभेड़ मा मारा गा रहै तबै मड़इन का लाग कि अब या इलाका मा शांति रही, पै 1 नवम्बर के घटना फेर से सब का दिल दहला दिहिस हवै।इटवा गांव मा कैरा यादव के गोली लागे से मउत होइ गे हवै अउर अर्जुन यादव घायल होइ गा हवै।मड़ई कहत हवै कि गोपा गैंग के मड़ई या घटना के जिम्मेदार हवै।
राजापुर क्षेत्राधिकार सुरेन्द्र प्रसाद शर्मा का कहब हवै कि घटना के कारन का पता नहीं चला आय जांच के बाद पता चली।
कैरा यादव का भतीजा रामचन्द्र यादव बताइस कि खेत मा बोर का काम करित रहै तबै चार-पांच मड़ई आये अउर गोली मार दिहिन। हमार कउनौ से दुश्मनी नहीं रही आय।भाई देव कुमार यादव बताइस कि पहिले भी हमार गांव मा इनतान के हादसा भे हवैं।घटना के डेढ़ घंटा बाद पुलिस आई हवै जबै डाकू गोली मारिन रहै तबै हुंवा दस बारा मड़ई रहें हवैं। जहां घटना भे हवै वा जघा घर से एक किलोमीटर दूरी हवै। अर्जुन के धोखे से गोली लाग हवै।
Published on Nov 3, 2017
बाईलाइन-नाजनी रिजवी
