जिला चित्रकूट, ब्लाक पहाड़ी, गांव बन्ना 35 साल के विमला के 16 जनवरी का बच्चा पैदा करत समय मउत होइगें। पहाड़ी के सामुदायिक स्वास्थ्य केंद्र मा विमला का बहुतै देर बाद जिला अस्पताल खातिर रिफर कीन गा रहै।यहै कारन डाक्टर अउर नर्स के लापरवाही से विमला के मउत होइ गे हवै। स्वास्थ्य विभाग या केस के जांच करावै का कहिन हवै।
विमला का भाई लवलेश बताइस कि हमार बहिनी का पहाड़ी के अस्पताल मा भर्ती करवा गा रहै। जबै रात के मोर बहिनी के हालत ज्यादा ख़राब होइ गें तौ नर्स दरवाजा नहीं खोलत रहै। मोर बहिनी के नींक से दवाई नही करिन आय। तबै वहिका जिला अस्पताल खातिर रिफर करिन हवैं। विमला के बहिनी मोहनी अउर ननद बदामिया का कहब हवै कि विमला का मनसवा लाखन बाहर वापी मा रहत हवै। विमला के सब बच्चा नींकतान भे हवै। पै या बच्चा दरकी वहिके हालत ख़राब होइ गें रहै। जबै पहाड़ी के रिफर करिन हवै तौ विमला बोल नहीं पावत रहै।
ऍम व्हाई सी डाक्टर मुकेश का कहब हवै कि रिफर करत दरकी वहिके जांच कीन गे हवै, तबै वा बोलत रहै। एम्बुलेंस देरी से आवै के कारन रास्ता मा बाबूपुर के लगे वहिके जान चली गे हवै । मुख्य चिकित्सा अधिकारी राम जी पाण्डे का कहब हवै हवै कि खून ज्यादा निकल गा रहै । यहै कारन वहिके मउत भे हवै जांच के बाद दोषी डाक्टर अउर नर्स के ऊपर कारवाही कीन जई।
रिपोर्टर- नाजनी रिजवी
18/01/2017 को प्रकाशित
