20 जनवरी का पेड मा लटकी मिली लास

जिला बांदा, ब्लाक तिन्दवारी, गांव भवानीपुर। हेंया 20 जनवरी का सुबेरे लगभग 11 बजे गांव के बाहर डब्बू उर्फ कमलेश उमर 50 वर्ष के लास एक पेड मा लटकी देख गांव मा हड़कंप मच गा। यहिके सुचना वहिके परिवार वाले तुरतै चिल्ला थाना का दिहिन। मैके मा पहुंची चिल्ला थाना एस.ओ. अउर एस.पी. मौका मुआयना करिन अउर लास का पंचनामा कइके पोस्टमार्टम का भेज दिहिन।
डब्बू उर्फ कमलेश दिक्षित का लडका धुन्नी कहिस कि मोर बाप चिल्ला के आर्दश जुनियार विद्यालय का हेडमास्टर रहै। 19 जनवरी का शाम के गांव के फगूनिया कहार से खेत मा पानी लगावैं का लइक बात बिवाद भा है। वहै रात हमरे बाप के हत्या कई दीन गे है। यहिसे हमका पुरा शक है कि उंई ही हमरे बाप के हत्या करिन है।
चिल्ला थाना मुंशी रमानंद का कहब है कि लालाभइया, चुनकउना,समलिया,उदय अउर फगूनिया कहार के नामजद रपट लिखी है गा है। धारा 147 बलवा 364 घर से ले जाना 302 हत्या 504 गाली गलौज 506 जान से मारैं के
धमकी लाग है। अब जांच कीन जात है।