जिला महोबा, ब्लाॅक पनवाड़ी, गांव महुआ इटौरा। एते के जूनियर स्कूल मे 12 जून खा खाना नई बनो हे। खाना बनाये वालेन ने बताओ की मास्टर स्कूल नई आउत हे, ओर न खाना बनत हे।
गांव को मुन्ना लाल कहत हे की मोये तीन बच्चा हे। एक कक्षा तीन मे पढ़त ओर दो बच्चा एक मे पढ़त हे। ई साल छुट्टी में भी खाना देय को नियम भओ हतो। जीसे खुशी भई हती की कछू सहारो हो हे। पे छुट्टी के बाद न मास्टर आउत हे न खाना बनत हे।
वैश्नवी, खुशी, सुधा ओर रिकीं कहत हे की जभे से छुट्टी भई हे। तभे से हम स्कूल नई जात हे।
खाना बनाये वाली गीता ओर कैलाश बताउत हे की जभे से छुट्टी भई हे। तभे से न मास्टर आउत हे ओर न खाना बनत हे। मास्टर हभें चाबी दये हे, ओर स्कूल खोले के बेठे खा कहत हे। न खाना बनाये खा कहत हे ओर न देत हे। पेहले बच्चन खा दूध दओ जात हतो। एक महीना से ऊ भी बन्द हे।
मास्टर गोविन्द मुरारी कहत हे की आज खाना नई बनो हे। रोज बनवाओ जात हे। जभे खाना रजिस्टर मगो गओ तो नई दओ ओर कहत हतो की रजिस्टर मे कोनऊ डीटेल नइयां।
पनवाड़ी के ए.बी.आर.सी. उमाशंकर से ई स्कूल के बारे मे बात करी तो मास्टर से फोन मे बात कर पूछां। मास्टर ने उमाशंकर से अपनी सफाई मे आसानी से जवाब दओ की खाना बनो हतो। बच्चा खाना खाके घर चले गये हते। जभे की स्कूल मे ऊ दिन चूल्हा नई जलो, हेडमास्टर छुट्टी मे हती।
रिपोर्टर – सुरेखा राजपूत
