हंगामा के बीच नहीं भर पाये फारम

जिला बांदा, ब्लाक नरैनी, गांव तुर्रा। हेंया समाजवादी पेंशन के फारम भरैं अउर पात्र मड़इन के छटनी खातिर 3 नवम्बर का खुली बइठक रहै। खुली बइठक मा फारम नहीं भरे गें। काहे से फारम भरैं का लक्ष्य कम अउर लोगन के संख्या ज्यादा है। या मारे पचासन मेहरिया मिल के 18 नवम्बर का अतर्रा हतसील मा दरखास दिहिन हैं।
कुम्हारन पुरवा के रजुलिया, राजाबाई, भोला अउर रन्नो बताइन-“हम बहुतै गरीब हन। हमरे एकौ विसुआ जमीन निहाय। खुली बइठक मा जउन लोगन के नाम बोले गे हैं उंई खेती किसानी अउर नौकरी वाले शामिल रहैं। कुछ मड़ई इं नाम का विरोध करिन। फारम भरे आये बी.डी.सी. सदस्य शम्भू, पंचायत मित्र, प्रधान अउर मड़इन के बीच लड़ाई मच गे। जेहिसे हमार फारम भी नहीं भरगे।
बी.डी.सी. सदस्य शम्भू का कहब है कि छह हजार वोटर के बीच सिर्फ दुई सौ अड़तिस फारम भरैं का लक्ष्य है। यतने कम लक्ष्य मा के हिसाब से केहिके-केहिके फारम भरे जाय गरीब तौ सबै हैं। हम फारम भर के ब्लाक मा जमा कई दीन है।