टूट परी स्कूल के बाउन्ड्री
जिला चित्रकूट, ब्लाक कर्वी, गांव सेमरिया चरणदासी। हिंया प्रथमिक स्कूल अउर जूनियर स्कूल एकै जघा चलत हवै। तीन बरस से स्कूल के बाउन्ड्री गिरी हवै। यहै से अन्ना जानवर अउर कुत्ता टट्टी कर जात हवंै। यहिके साथै मड़ई हैण्डपम्प बिगाड़ जात हवै। यहै से बी.आर.सी. विभाग मा कइयौ दरकी बाउन्ड्री बनावै खातिर दरखास दीन गे, पै अबै तक नहीं बनी आय।
जूनियर हाई स्कूल के हेडमास्टर शिवकल्याण अउर प्राथमिक स्कूल के सहायक मास्टर शशिभूषण का कहब हवै कि बाउन्ड्री न बनै से कइयौ समस्या हवंै। बच्चन के पढ़ाई मा कहुतै ज्यादा असर परत हवै। सरकार येत्ता रूपिया नहीं देत कि बाउन्ड्री बनवा सकैं। स्कूल के बाउन्डी बनावे खातिर कइयौ दरकी बी.आर.सी. विभाग मा अउर बेशिक शिक्षा विभाग मा दरखास दीन गे हवै, पै आज तक बाउन्ड्री बनवावै खातिर विभाग ध्यान नहीं दिहिस आय।
बेशिक शिक्षा विभाग के सत्येन्द्र बाबू का कहब हवै कि सरकार कइती से मार्च तक बजट पास होइ तौ स्कूल के बाउन्ड्री बन सकत हवै।