साल भर टूटी पड़ी चित्रकूट के राजापुर की पुलिया, कभी भी हो सकती है बड़ी दुर्घटना

जिला चित्रकूट, ब्लाक रामनगर, क़स्बा राजापुर। राजापुर से मानिकपुर जाये वाली सड़क के पुलिया एक साल से टूट पड़ी हवैं जेहिमा अबै तक कइयौ घटना घट चुकी हवैं, अबै भी बड़ी घटना होय के डेर हमेशा बनी रहत हवैं।
पी डब्ल्यू डी. के सहायक अभियंता कृष्ण कुमार अबै भी आपन पुरान राग अलापत हवै, अउर कइत हवै कि पुलिया खातिर प्रस्ताव बना के भेंज दीन गा हवै जबै बजट अई, तबै पुलिया बनीं।
संतोष कुमार अउर अजय तिवारी का कहब हवै कि पुलिया टूट से बहुतै समस्या हवै। रात दिन हमें यहिसे परेशानी होत हवै, काहे से हम पास मा रहित हन, तौ कउनौ घटना होत हवै, तौ मड़ई हमें चिल्लात हवैं। येत्ते दिन से पुलिया टूटे के बादौ अबै तक विभाग से कोउ जांच खातिर नहीं आवा आय। न अबै तक पुलिया बने खातिर कउनौ बजट आवा आय। या सड़क से रोज लगभग डेढ़ हजार वाहन निकलत हवैं। दुइ तीन दरकी बड़े-बड़े वाहन फंस जात हवै जिनका खेतन से निकाले का पड़त हवै।
योगेन्द्र अउर राकेश का कहब हवै कि नेता अउर अधिकारी सबहिन के आंखी बंद हवै। कउनौ या समस्या का ध्यान नहीं देत हवैं। नेता नगरी मा कउनौ अच्छा काम नहीं करत हवैं। अनजान मड़ई या रास्ता से निकलत हवै तौ पुलिया मा फंस गे हवै। बड़ी घटना होय के डेर हमेशा बनी रहत हवै।
टेम्पो चलावै वाला अखिलेश कुमार का कहब हवै कि सड़क के कारन सावरी के गाड़ी छूट जात हवै तौ उंई हमैं गाली देत हवैं।देरी से जाये के कारन हमार गाड़ी का नम्बर भी नहीं आवत।

रिपोर्टर- सहोद्रा

Published on Jan 19, 2017