जिला फैजाबाद, ब्लाक मया, ग्रामसभा अरवत। हिंया कै प्राथमिक स्वास्थ्य उपकेंद्र साल भर से बंद बाय। वही प्राथमिक स्वास्थ्य केंद्र रत मा न खुलै से रात मा डिलेवरी के ताई मेहरारू का पूरा बाज़ार या फिर मया जाय का पराथै। अगर केहू का जल्दी रहै तो समय से इलाज नाए मील पावत। पहिले ए.एन.एम. बैठत रही लकिन जबसे उनकै बदली होई गे तबसे केहू नाए बैठत।
गांव कै आसाराम अउर रामजीत यादव बताईन कि सत्तरह अट्ठारह साल पहिले ई स्वास्थ्य केंद्र बना रहा। तबसे ए.एन.एम. रहत रही डेढ़ साल पहिले उनकै बदली होइगै तबसे रत मा बंद परा बाय। नई ए.एन.एम. कै न्युक्ति भए बाय लकिन वै नाय बैठतिन। अगर रात विरात कौनो केस होय जाए तो पूरा बाज़ार या फिर मया लै जाए का पराथै। तब तक मरीज कै जान भी जाए सकाथै। जेकरे पास खुद कै साधन बाय उतो चला जाथै।
राजेन्द्र प्रसाद कहिन कि गोसाई गंज अउर पूरा से एम्बुलेंस आवाथै तब मरीज का लैजाए जाथै। पहिले से फोन कईके बुलावा जाथे। अगर रात बारह बजे डिलेवरी केस हुवे तो मनई कहा लईके जाए। मजबूरी मा अपने साधन से लईके जाए का पराथै। अगर प्राथमिक स्वास्थ्य केंद रात मा खुलै लागे तो येहिके मनईन कै परेशानी दूर होय जाये।
आशा कार्यकर्ता मालती वर्मा कहिन की अपने सुबिधा के अनुसार सब करा थिन। पहिले से फोन कईके एम्बुलेंस बुलाय जाथे। जबसे ए.एन.एम. कै बदली भे तबसे न केंद्र कै साफ सफाई भए न ही केहू बैठाथै।
प्रोग्राम मैनेजर नेहा तिवारी बताईन कि उपकेंद्र पै मेन फोकस टीका करण कै हुआथै। बुधवार अउर शनिवार का टीकाकरण हुआ थै वही दिन केंद्र खुला थै। ए एन एम संतोष पांडे बताईन कि हम वहिकै स्थिति देखिके साफ सफाई कराउब। फिर हर दिन बैठब।
चिकित्सा अधीक्षक ए. के. सिंह बताईन कि वहि ए।एन।एम का रहै के ताई आवास बना बाय। हमें एकै जानकारी नाय रही की केंद्र बंद बाय। ए.एन.एम. का सूचित कै जाये की वहि रहै जेसे मनईन का सुबिधा मिल सकै।
सालों से बंद पड़ा फैजाबाद के अरवत गाँव का प्राथमिक स्वास्थ्य केन्द्र
