जिला बांदा, ब्लाक नरैनी, गांव महोतरा का मजरा चांदन का पुरवा। हेंया का चुन्नू 23 जून का एस.पी. राकेष षंकर का दरखास दइके आपन लड़की के हत्यारे ससुराल वालेन के ऊपर कारवाही करैं के मांग करिस है। एस.पी. कारवाही करैं का भरोसा दिहिन।
चुन्नू का कहब है, ‘मैं आपन लड़की ज्योति के षादी 2008 मा नरैनी ब्लाक के नीबी गांव का मजरा बिरौना डेरा मा अखिलेष साथै कीने रहौं। षादी के बाद ससुराल वाले दहेज मा मोटर साइकिल के मांग करैं लाग। मैं मजदूरी करैं वाला मोटर साइकिल खरीदैं का यतना रुपिया कहां पाऊं। मोरे चरौरी बिनती करैं का फायदा ससुराल वाले उठा के ज्योति के साथै मारपीट करैं लाग। 17 जून का मार-मार के वहिके जान लई लिहिन अउर मिट्टी का तल डाल के जला दिहिन। हमका सूचना दिहिन कि ज्योति आगी लगा के जल गे है। मैं 20 जून का कालिंजर थाना रपट लिखावैं गयेंव, पै पुलिस रपट नहीं लिखिस।’
अखिलेष का कहब है कि थोई-थोई के बातन मा आगी लगा लिहिस है। मैं दहेज के मांग नहीं करेंव। ज्योति के मइके वाले मोहिका फंसावैं चाहत रहे हैं।
कालिंजर थाना का दरोगा अनिल कुमार कहिन कि या घटना के रपट न लिखी जई। हम जांच कीन है जेहिमा पावा गा है कि ज्योति का ससुराल वाले नहीं मारिन। वा खुदै आत्महत्या करिस है।
एस.पी. राकेष षंकर कहिन कि कालिंजर थाना का रपट लिखैं का आदेष दई दीन गा है। अगर पुलिस रपट न लिखी तौ कड़ी कारवाही कीन जई।