सर्वे में करत हे घपला

राशन कार्ड बिना परेशान

जिला महोबा, ब्लाक कबरई, गांव कहरा, दलित बस्ती, वार्ड नम्बर चार। एते के कछु आदमी आठ दस साल से राशन कार्ड बिना परेशान हते। जीसे अब सरकार सर्वे करा खे राशन कार्ड बनवाउत हे। जीमें सर्वे करे वाले कर्मचारी गांव के गरीब मजदूर आदमियन से रूपइया लेत हें, ओर पूरे गांव के सर्वे सई से नई करत हे।
शिवदास, बल्दू, रामकृपाल ओर महाबीर ने बताओ कि हम मेहनत मजदूरी कर के परिवार पालत हंे। हमाए दस साल से कोनऊ राशन कार्ड नइयां। अभे राशन कार्ड बने कि नोमत आई हे तो ऊमें भी सई से सर्वे नई भओ हे। आधे गांव का सर्वे भओ हे ओर आधे गांव को नई भओ। जोन आदमियन को सर्वे भओ हे ऊआदमियन से दस-दस बीस बीस रूपइया सर्वे करें वाले लेत हंे। ईखी जानकारी हमने प्रधान खे दई हती।
प्रधान केसर रानी के आदमी राममिलन ने बताओ कि मोए गांव की आबादी चार हजार ओर वोटर छब्बीस सो हे। राशन कार्ड को सर्वे आंगनवाड़ी ओर मास्टरन के द्धारा भओे हतो। कछु आदमियन के सर्वे के रूपइया लए हें। ईखी जानकारी हमें मिली तो ऊखी सूचना ब्लाक में दई हती। जीसे पूरे गांव का सर्वे नई हो पाओ हे।
कबरई ब्लाक के ए.डी.ओ. सुरेश मिश्रा ने बताओ कि राशन कार्ड के सर्वे में कोनऊ रूपइया नई लगत हे। राशन कार्ड बने के बाद पीले राशन कार्ड के दस रूपइया ओर सफेद राशन कार्ड के पांच रूपइया लगत हे,लाल राशन कार्ड में एकऊ रूपइया नई लगत हे। रूपइया ले की जानकारी हमें मिली हती, रूपइया ले वालो के ऊपर कड़ी कारवाही करी हे। जीसे अब कोनऊ से रूपइया न लओ जेहे।