सड़क मा गड़हा

जिला फैजाबाद, ब्लाक तारून। हिंआ गौरा से लइके रामपुर भगन तक राम वन गमन मार्ग लगभग 6 किलोमीटर सड़क बाय। जेहमा तीन साल से बहुत ज्यादा गड़हा होय गै बाय। यही से आवै जाए वाले मनई का बहुत दिक्कत उठावै का परा थै।

गंगाराम, माधुरी, मस्तराम, रामउजागिर, जानकी बताइन कि यहि सड़क मा यतना बड़ा-बड़ा गड़हा बाय कि आवै जाए मा बहुत दिक्कत हुआ थै। सड़क टूटे से गिट्टी बिखरी बाय मनई गिर जाए तौ गिट्टी घुस जाए। दिन मा तौ मनई सम्हरि के आवत जा थिन रात मा अंधेरा होय से पहले जे आय जा थै तौ वतनी दिक्कत नाय हुअत। नाही तौ मनई उतरि के आवत जा थिन। रामदीन बताइन कि अबही तौ ठीक बाय। लकिन बरसात मा पानी भर जा थै तौ इ नाय जानि परत कि कहां गड़हा बाय कहां नाय। सब साइकिल लै-लै वही मा गिरा थिन।

पूरी गांठ भै पानी भर जा थै। लकिन काव करै झेलै का परा थै।

खबर लहरिया कै पत्रकार अपने आंख से देखिन दुई दिन आवै जाय वाले साइकिल लइके गिरा रहे। अगर हिंआ मेन रोड की नाय हमेशा गाड़ी चलत हुअत तौ रोज एक नाय एक एक्सीडेन्ट हुआ करत। पी.डब्लू. डी विभाग कै सहायक अभियन्ता डी. के चौधरी बताइन कि तीन किलोमीटर प्रधानमंत्री ग्रामीण सड़क योजना देखा थै। बाकी तीन किलोमीटर हमरे अण्डर मा आवा थै। जवन हम वित्तीय वर्ष के अन्त तक बनुवाय दियब।