बताउत समस्या
जिला महोबा, ब्लाक जैतपुर, गांव कैथोरा। जोन गांव मार्च महीना में लोहिया ग्राम आवास पास भए हें। चार महिना पूरे होय वाले हे पे अभे तक गांव में शौचालय को नामो निशान नइयां।
गांव के जमुना, कस्तूरी, कुसुम, ओर बेटीबाई ने बताओ कि गांव लोहिया ग्राम आवास पास हो गओ हे, पे पूरे गांव में शौचालय नइयां। हम लोगन खे रात विरात टट्टी होय लगभग एक किलो मीटर दूरी जाने परत हे। टट्टी होय ओतई आदमी जात हे ओर ओतई ओरतें जाती हें। जीसे शौचालय बिना हमे बोहतई परेशानी आउत हे। हम सोचत हे कि शौचालय बन जाए तो बोहतई नींक हो जेहें।
प्रधान विमला देवी के आदमी रामाधार ने बताओ कि मार्च में लोहिया ग्राम आवास हो गओ हे, जीसे पूरे गांव में शौचालय बनहे। आदमी टैंक वाले शौचालय मांगत हे। जभे कि शासन के एते से जाली वाले शौचालय पास भए हे। अभे बजट नई आओ आय जभे आ जेहे तो सबके शौचालय बनवा दए जेहे।
