शिवरामपुर मा डेंगू 15 लोग भर्ती

जिला चित्रकूट, ब्लाक कर्वी कस्बा शिवरामपुर, मारवाड़ी बस्ती। हिंया अचानक से 15 नवम्बर 2014 से डेंगू के बीमारी बहुतै जोर से फइली हवै। घबड़ाये लोग इलाज खातिर मरीजन का जबलपुर मा भर्ती कराइन हवैंै। गम्भीर हालत के बादौ जिला अस्पताल या बीमारी से बे खबर हवै।
बस्ती के मीना, राव सिंह अउर संतू का कहब हवै कि नाली कूड़ा से बजबजात हवैं। या कारन गन्दगी रहत हवै। नाली मा गंदा पानी भरा होय के कारन मच्छर खूबै लागत हवैं। यहै से बस्ती के लगभग पन्द्रह मड़इन का डेंगू होइगा हवै। उंई पहिले सोनेपुर सरकारी अस्पताल मा इलाज कराइन, पै कउनौ फायदा नहीं भा। यहै से मध्य प्रदेश के जबलपुर शहर मा इलाज करावैं गें। हुंवा से आराम लाग हवैं सोचैं वाली बात हवै कि अबै तक डाक्टर बस्ती मा झाकैं तक नहीं आय हवैं।
पीडि़त मरीज के परिवार का हेमन्त का कहब हवै कि राजू गुप्ता का 16 नवम्बर से बुखार आवत रहै। वहिके मूड़, गोड़ अउर पेट मा पीरा होत रहै। वा जिला अस्पताल मा इलाज कराइस, पै कउनौ फायदा नहीं भा। यहै से जबलपुर इलाज करावै लइ गयेंव हुंवा खून के जांच भे तौ पता लाग कि डेंगू हवै। प्रधान शिवबरन कपडि़या कहिस कि नाली अक्टूबर के महीना मा साफ कराये रहौं।
जिला के सी.एम.ओ. वेद प्रकाश कहिन कि 19 नवम्बर 2014 का टीम भेजी गे हवै। बस्ती मा मच्छर के दवाई डी.डी.टी का छिड़काव करा दीन गा हवै।ं मड़ई सोनेपुर मा इलाज करावैं। मरीजन का पूर व्यवस्था अउर सुविधा हवैं।