शादी के बाद से दहेज मा भैंस मांगत दामाद

जिला बांदा, ब्लाक महुआ, ग्राम पंचायत नन्दना, मजरा सेमरिया मिरदहा। हेंया का बदलूराम 22 अप्रैल 2014 का आपन बिटिया लिवाय नरैनी कोतवाली मा बइठ रहै। पूंछै मा पता लाग कि बिटिया का वहिकर मनसवा लवकेश मारिस हैं। यहिसे रपट लिखावैं आवा है।
बदलूराम बतावत है कि 27 मई 2013 का बिटिया रामबाई के शादी नरैनी ब्लाक, गांव जमवारा, मजरा सकरिहा पुरवा मा लवकेश साथै करे हौं। शादी के बाद से दामाद लवकेश दहेज मा भैंस मांगत है। आय दिन बिटिया का दारू पी के मारत है। 21 अप्रैल 2014 का शाम के बिटिया का इनतान मारिस है कि आंखी नीली पड़ गे है अउर पूरे देह मा चोट आई है। तबै बिटिया का जेठ मोहिका फोन करके सूचना दिहिस है। जबै मैं रात के बिटिया के ससुराल पहुंचेव तौ घर मा ताला लटकत रहै। बिटिया दूसरे के घर मा बेहोश परी रहै। यहिसे अब मैं दामाद के ऊपर मुकदमा लगइहौं। अगर जेठ, सास अउर मोहल्ला वाले बचावत हैं तौ उनका भी मारत है अउर गाली-गलौज करत है।
नरैनी कोतवाली प्रभारी चैधरी रमेश सिंह कहत हैं कि रानीबाई के डाक्टरी होइगे है अउर डाक्टरी रिपोर्ट भी आ गे है। अब लवकेश के खिलाफ दहेज प्रथा का मुकदमा लिखा जई। लवकेश का बुलावा गा है। रानीबाई के सास का कहब है कि हम लड़का से खुद परेशान हन। अगर कुछ कहत हन तौ हमका भी मारै का दउरत है। यहिसे वा खुद जानै हम कुछ नहीं कहि सकत आय।