जिला चित्रकूट, ब्लाक रामनगर,कस्बा रामनगर क्षेत्र का एक गांव हिंया के एक मड़ई का आरोप हवै। कि पड़ोस मा रहै वाले विजय केवट अउर राम लखन मोरे लड़की साथै 23 फरवरी का बलात्कार करिन रहै। उनका या मामला मा जेल भी होइगे रहै पै अब जेल से छूट के आगे हवै। उंई मोरे लड़की के शादी नहीं होय देत हवै। उंई लड़का वालेन से जा के मना कइ देत हवै। ऊपर से जान से मारै के धमकी देत हवै। यहिसे परेशान रहत हौं।
गांव के एक मड़ई का कहब हवै कि मोर लड़की 23 फरवरी का घर मा अकेली रहै। लड़की का अकेली जान के पड़ोसी विजय केवट अउर राम लखन घर के भीतर घुस आय अउर दूनौ जन लड़की साथै बलात्कार करिन यहिके रपट मऊ थाना मा 26 फरवरी का लिखाइगे रहै। उनका एक महीना जेल मा रखै के बाद पुलिस छोड़ दिहिस उंई गाली गलौज करत अउर धमकी देत हवै। कि अगर अब रपट लिखइहै। तौ जान से मार दीन जई। लड़की का दुइ जघा शादी का रिस्ता लगायेंव पै लड़के वालेन का अपने लगे बोला के मना कइ देत हवै ।
यहिसे हमार बेइज्जती होत हवै। लड़की के महतारी भी नहीं आय। यहिसे मैं मजूरी करै खातिर नहीं जा पावत हौ। उंई हमार जियब मुश्किल कीने हवै। यहिसे अब डी. एम. का लिखित दे खातिर सोचत हौं।
मऊ थाना के बड़े दरोगा शैल कुमार सिंह का कहब हवै कि उनके खिलाफ 376 (बलात्कार) के धारा लाग हवै। अगर उंई लड़की के शादी नहीं होय देत हवै तौ यहिके खातिर जांच कीन जई।
रिपोर्टर – सहोद्रा देवी और नाजनी रिजवी