जिला बांदा ब्लाक नरैनी, कस्बा नरैनी आज मड़इन के लगे सुविधा के कमी नहीं आय। गाड़ी से लइके घर तक के सुविधा है। पै अबै भी मड़ई खुले मा टट्टी करै खातिर जात है। हेंया के कुछ मड़इन का अबै तक शौचालय मिला आय न कलोनी मिली आहीं। यहै कारन मड़ई नगर पंचायत मा शिकाइत करिन है। कुछ मड़ई का शौचालय अउर कलोनी मिल गे है।
राजेन्द्र का कहब है कि शौचालय बनावै खातिर विभाग कइत से 4 हजार रुपिया मिला रहै। शौचालय बनावै मा मोर 20 हजार रुपिया लाग है। जेहिमा 70 किलो सरिया 8 बोरी सीमेंट अउर 36 सौ के ईटा लाग है। कउनौ कहत है कि 8 हजार कउनौ कहत है कि 12 हजार रुपिया शौचालय खातिर मिलत है। मोबिना खातून बताइस कि हमार शौचालय खातिर रुपिया नहीं आवा आय। न हमें कलोनी मिली आहीं। यहिके खातिर कइयौ दरकी विभाग मा कहे हन पै कुछौ सुनवाई नहीं होत आय।
शब्बो खातून बताइस कि मोर नाम से लोहिया आवास के कालोनी आयी रहै। पै कालोनी मा कुछौ सुविधा नहीं आय। कलोनी आधी अधूरी पड़ी है
नगर पालिका ई. ओ. अमर बहादुर सिंह का कहब है कि शौचालय खातिर रूपिया दीन जात है 4 हजार केंद्र सरकार 4 हजार राज्य सरकार देत है। गांव मा शौचालय खातिर 12 हजार दीन जात है। शहरी क्षेत्र के मड़ई 12 हजार के मांग करिन है। सरकार यहिके खातिर भरोसा दिहिस है।
लोहिया आवास अधिकारी लाल व्रत यादव का कहब है कि कुल 256 कलोनी है बालू के कमी अउर नोटबंदी के कारन काम पूरा नहीं कीन गा आय। एक महीना मा काम पूरा कीन जई।
रिपोर्टर- गीता देवी
25/05/2017 को प्रकाशित
