वार्ड सदस्य करत आपस मा चर्चा
जिला बांदा, ब्लाक नरैनी, कस्बा अतर्रा। हेंया के वार्ड सदस्य 2 सितम्बर 2014 का अतर्रा तहसील दिवस मा डी.एम. हरेन्द्र वीर सिंह का दरखास दइके चेयरमैन के हटावैं के मांग करिन हैं।
वार्ड नम्बर 25 के वार्ड सदस्य अनीता अउर वार्ड नम्बर 1 के वार्ड सदस्य सुमन बतावत हैं कि अतर्रा कस्बा मा कुल पचीस वार्ड हंै जेहिमा 24 वार्ड भरे हैं अउर एक वार्ड मा वार्ड मेम्बर का पद खाली है। होंआ वार्ड सदस्य न होय से बिजली, पानी अउर गंदगी के समस्या के भरमार है। वार्ड नम्बर 8 के वार्ड सदस्य राधा भी बिजली, पानी अउर गंदगी के समस्या बताइस पै बजट न मिल पावैं से समस्या का झेलत हैं। एक हैण्डपम्प के मांग तीन साल से करत हन। इं सबै समस्यन के सुधार खातिर हम सब चेयरमैन के मीटिंग मा मांग भी कीन हन, पै समस्या का नहीं सुधारा गा आय। पचास सफाई कर्मी का वेतन रोक लीन गा है। या मारे पूरे कस्बा मा गंदगी के भरमार है।
चेयरमैन पुष्पा जाटव का कहब है कि कस्बा मा सबै काम कराये जात हैं। वार्ड सदस्य झूठ आरोप लगावत हैं कि गन्दगी हटावैं का काम नहीं कीन जात आय। डी.एम. अउर अतर्रा एस.डी.एम. दूनौ जन नगर पलिका अधिशाषी अधिकारी का जांच करैं खातिर कहिन हैं। अतर्रा अधिषाशी अधिकारी नरेन्द्र कुमार कहिन कि रूका विकास का काम अउर गंदगी सफाई का काम करावा जई।