लाग कूड़ा का ढेर, कसत निकरैं मड़ई

जिला चित्रकूट, ब्लाक कर्वी, कस्बा शिवरामपुर। हिंया इटखरी सहकारी समिति के पीछे लगभग चार महीना पहिले नाली के सफाई कीन गे रहै। अबै तक प्रधान शिवबरन कपडि़या नाली का कूड़ा नहीं उठवाइस हवै।
कस्बा के महेश कुशवाहा, शंकर अउर चंद्रप्रकाश का कहब हवै कि रास्ता के किनारे कूड़ा हवै। यहै से निकरैं मा परेशानी होत हवै। छोट-छोट लड़का बच्चा वहै कूड़ा मा गिर जात हवैं। कूड़ा से बदबू आवत हवै। यहै से आपन दुआरे के लगे बइठ के धूप तक नहीं लइ पाइत हन।
प्रधान शिवबरन कपडि़या कहिस कि नाली का कूड़ा 15 जनवरी तक उठवा दीन जई।

जिला चित्रकूट, ब्लाक रामनगर, कस्बा रामनगर। हिंया नाली नहीं बनी हवै। यहै से रास्ता मा गंदा पानी भरा रहत हवै। नाली बनवावैं खातिर प्रधान कामता प्रसाद से 30 नवम्बर 2014 का कहा गा, पै वा कउनौ ध्यान नहीं दिहिस।
कस्बा के कल्लू लक्ष्मीनिया अउर सुबिहती का कहब हवै कि मड़इन के नहाये धोवै का पानी रास्ता मा भरा रहत हवै। पूर कस्बा मा गंदगी रहत हवै। गंदगी होय के कारन बीमारी फइलैं का डेर भी बना रहत हवै।
प्रधान कामता प्रसाद का कहब हवै कि नाली बनवावैं खातिर बजट नहीं आय। यहिके खातिर ब्लाक मा 10 दिसंबर का लिखित दीने हौं।
ए.डी.ओ. बिंदा प्रसाद कहिन कि नाली फरवरी 2015 तक बनवा दीन जई।