तिजिया
जिला महोबा, ब्लाक जैतपुर, गांव अतरपठा। एते की तिजिया आपन बीती कछू एसो बताउत हे।
तिजिया ने बताओ कि 15 मई 2014 खा में अपने मायके शाहपहाड़ी शादी में गई हती। जभे 20 मई 2014 खा लौट के आई तो घर को दरवाजा खुलो हतो। जभे मेंने अपने सास ससुर देवर ओर आदमी रामदास से पूछो तो ऊ मोए चोरी को आरोप लगाउन लगे। मोई सास परमी कहत हे कि ते एते से चली जा तोओ एते कोनऊ नइयां। मोओ आदमी रामदास भी जान से मारे खा धमकी देत हे। मोए पांच लड़का बिटिया हे में अपने बच्चन खा लेके किते जेहो। एई से मेने 20 मई 2014 कुलपहाड़ कोतवाली में रिपोर्ट करी हे।
तिजिया की सास परमी ओर आदमी रामदास बताउत हे कि घर को सब समान अपने मायके में धर आई हे। ऊ मोए साथे नई रहा चाहत हे। ऊ जान से मारे ओर घर से निकारे को झूठो आरोप लगाउत हे। ऊने झूठी कुलपहाड़ कोतवाली में रिपोर्ट करी हे।
कुलपहाड़ कोतवाली के एस.ओ. घनश्याम सचान ने कहो कि ऊ आपसी घर को मामला हे। ई केस के बारे में कछू नई बता सकत हो।