सड़क को जा हाल
जिला महोबा, ब्लाक चरखारी, कस्बा खरेला। एते मंगली बाजार से लेके बस स्टैण्ड तक लगभग एक किलोमीटर सड़क बसपा सरकार में बनी हती। जोन दो साल से उखड़ो परो हे। ईखे बनवाये खे लाने केऊ दइयां नगर पंचायत में कहो हे, पे कोनऊ सुनवाई नई होत आय।
कस्बा के शिवनारायण, लक्ष्मी गुप्ता ओर शीलू ने बताओ कि जा रास्ता लगभग आठ साल पेहले बसपा की सरकार में बनो हतो। जोन दो साल से उखड़ो परो हे। ईखे मारे रास्ता में बड़े-बड़े गड्ढा हो गये हें। जीसे तनक सो पानी बरसे में रास्ता में पानी भर जात हे। प्रवेन्द्र बताउत हें कि जा रास्ता से हजारन आदमी निकरत हे। एई से हम चाहत हें कि जा रास्ता बन जाये तो नींक हो जेहे। ईखे लाने हमने में केऊ दइयां चेयरमेन सिद्वगोपाल से कहो हे, पे कोनऊ सुनवाई नई होत आय। एसई किशन बताउत हें कि में सर्राफा खे दुकान धरे हें। जभे जा रास्ता खे गिलाव से हेल खे आदमीे दुकाने आउत हें। तोे दुकान में बिछो कालीन गंदा हो जात हे। अगर चेयरमेन रास्ता न बनवाहे तो हम डी.एम. खा दरखास देबी। खरेला नगर पंचायत के बाबू महेन्द्र कुमार ने बताओ कि ऊ रास्ता बनवायें खे लाने प्रस्ताव पास हो गओ हे। जभे स्टीमेंट बन के आ जेहे तो टेण्डर करवा के रास्ता में काम सुरू करा दओ जेहे।