जिला अम्बेडकरनगर, ब्लाक कटेहरी, गावं प्रतावीपुर। हिंआ गावं वालेन के आरोप बाय कि कोटेदार पूरा राशन नाय देतिन। पैतिस किलो नियम बाय तीस किलो ही देथिन। अउर पैसा पूरा लियाथिन।
कार्यधारक कालिका प्रसाद तिवारी, सुरेन्द्र तिवारी, राम अशीष तिवारी, दातादीन, मतन बताइन कि कोटेदार हर महीना राशन कम देथिन। पैतिस किलो मिलै का चाही लकिन तीस किलो देथिन, अन्त्योदय कार्य धारक से एक सौ तीस रूपया लेथिन। बी.पी.एल. कार्ड धारक से 250 रूपया लेथिन।
कोटेदार घिसियावन शाहपुर बताइन कि एक कुन्तल राशन निःशुल्क सेवा मा दई दिहेन, छिनकू कै मेहरारू मरी गइन उनके क्रियाक्रम खातिर दिया गै। पचास किलो गेहूं महेश तिवारी का दई दिया गै उनकै लड़की कै गौना रहा। यही कारण से राशन कम होई गै बाय। हर कार्ड के पीछे एक किलो कम दिया जात बाय। बी.पी.एल. कार्ड धारक तिरान्नवे हई, अन्त्योदय कार्ड धारक तिरपन कार्ड बाय। जव राशन कम आवाथै। यही मा सबका देखै का पराथै गरीब दुखिया सबका राशन दिया जाथै।
राजकीय गोदाम कटेहरी से पता चला कि कोटेदार घिसियावन अठठाइस कुन्तल चालिस किलो गेहूं, तैतिस कुन्तल एकतिस किलो चावल अउर चार कुन्तल चीनी उठावत थिन।