मैदा, खोया, डालडा, और एक लौंग का कमाल! चित्रकूट के बरगढ़ में आ रही है लौंगलता तलने की खुशबू.

जिला चित्रकूट, ब्लाक मऊ, कस्बा बरगढ़ बुन्देलखण्ड मा खाय के चीज मशहूर हवैं। चाहे वा बांदा का सोहन हलुवा होय या चित्रकूट मा बिके वाली खोवा की जलेबी। पै बरगढ़ कस्बा मशहूर हवै लौंग लता के कारन।
हिंया श्याम स्वीट हाउस मा लौंग लता बिकत हवैं। जेहिकर स्वाद ग्राहकन का आपन कइत खींचत हवैं। स्वीट हाउस दुकान के मालिक सुशील जैन का कहब हवै कि हमार 10 साल से मिठाई के दुकान हवै। जेहिमा लौंग लता मिठाई बहुतै बिकत हवै। मिठाई लौंग लता पाठा क्षेत्र के सबै गांवन के मड़ई हमरे दुकान मा आवत हवै। रोज लगभग 100 पीस बिक जात हवै।
लौंग लता बनावै वाला मिस्त्री विकास बताइस कि 3-4 साल से मैं या दुकान मा मिस्त्री का काम करत हौं। लौंग लता बनावै खातिर एक किलो मैदा मा 250 ग्राम डालडा का मोवन डाला जात हवै फिर पानी डाल के कड़ा कड़ा सान लीन जात हवै। भरे खातिर खोवा चीनी का भूरा अउर मेवा काजू बादाम गरी छुहारा डाला जात हवै। खोवा का भूज के सब मेवा अउर चीनी भूरा डाल के नींकतान मिला के मैदा मा बेल के भरा जात हवै। फिर तला जात हवै।
रोज लगभग 3 किलो मैदा के खपत होत हवै। एक पीस 5 रुपिया के बिकत हवै। ग्राहक दीपक कुमार बताइस कि 6 किलोमीटर दूरी से जबै बाजार करे आवत हौं तौ लौंग लता जरुर खात हौं। काहे से यहिकर स्वाद बहुतै नीक हवै।

रिपोर्टर- सुनीता देवी

29/05/2017 को प्रकाशित