मेहरारू का जलाय के मारै कै आरोप

जिला अम्बेडकर नगर, ब्लाक टांडा, गांव अमरतल। हिंआ 5 नवम्बर का सम्मनपुर थाना क्षेत्र मा एक बाइस साल के शादी सुदा मेहरारू का जलाय के मारै के आरोप मा मैके वाले लिखाइन रिपोर्ट।
मृतका कै पिता रामकिशोर राजभर, चाचा राजेश कुमार रहै वाला कोड़रा कै कहब बाय कि अपने बिटिया गीता देवी कै वियाह दुई साल पहिले अमरतल गांव मा स्वर्गीय रूदल राजभर के बेटवा इंद्रेश राजभर के साथे करे रहेन। उनकै आरोप बाय कि दुई बार ससुराल आवै के बाद गीता का आंशका भै कि परिवार के एक मेहरारू से अवैध सम्बन्ध बाय। यही बात से पति पत्नी मा हमेशा मन मुटाव रहत रहा। 5 नवम्बर 2015 कै गीता देवी कै जलिके मउत होइगै। चाचा राजेश कै आरोप बाय कि हमरे भतीजी का परिवार अउर पति जलाय दिहिन। बार-बार प्रताडि़त करत रहिन। सम्मनपुर थाना मा पति सास, जेठानी के खिलाफ केस दर्ज कराईन। मैके वाले शव पोस्टमार्टम खातिर पुलिस का लई नाय जाए देत रहिन। थानाध्यक्ष के समझावै बुझावै के बाद शव पुलिस का सौपिंन।
सम्मनपुर थाना कै एस.ओ. वासुदेव राणा कै कहब बाय कि राजेश राजभर के तहरीर पै पति इंद्रेश, सास संतराजी, जेठानी बदामा के खिलाफ दहेज उत्पीड़न अउर हत्या कै धारा लाग बाय। सास का गिरफ्तार कीन गै बाय। अउर सब जने कै तलास किया जात बाय। छानबीन करे के बाद आगे कार्यवाही होये।