एस.पी. खा दई दरखास
जिला महोबा, ब्लाक कबरई, कस्बा खन्ना। एते की सुमन अपने भाई ओर बाप खा खन्ना थाने में 5 अगस्त 2014 खा रात 8 बजे खाना देय खे लाने गई हती। जीखा मुन्शी रूपसिंह ने गाली गलौज करके भगा दओ हे। जीखी दरखास सुमन ने 6 अगस्त 2014 खा एस.पी. खा दई हे।
सुमन ने बताओ कि मोओ भाई बाप की ग्योढ़ी गांव में कोनऊ से लड़ाई हो गई हती। जीसे ऊखे खन्ना थाने की पुलिस पकर लाई हती। 5 अगस्त 2014 खा रात 8 बजे में अपने बाप ओर भाई खा खाना देय गई हती। तभई थाने को मुन्शी रूपसिंह कहत हतो कि किते जात हे। जभे मेने बताओ कि खाना लेके आई हों, तो कहन लगो कि खाना के साथे खर्चा लाई हो कि नई। जभे मेने गरीब होंय के कारन रूपइया न लाये की बात कही तो ऊने मोये गाली देके जोर से धक्का मारो ओर कहो कि एते से भग जा। मेने कहो की साहब खाना खबायें के बाद चली जेहों तो मुन्शी मोये ज्यादा गाली गलौज ओर धक्का मुक्की करके थाने से ेबाहर निकार दओ, ओर दुबारा थाना के भीतर न आये की धमकी दई। एई से मेने मुन्शी रूपसिंह के खिलाफ 6 अगस्त 2014 खा एस.पी. बब्लू कुमार खा दरखास देके न्याय की गुहार लगाई हे।
मुन्शी रूपसिंह ने कहो की सुमन अपने भाई ओर बाप खा हवालात में बीड़ी ओर माचिस देत हती। जोन नियम में लागू नई हे। जीसे सुमन खा मना करो हतो। मेने गाली गलौज नई करी हे ऊ झूठो आरोप लगाउत हे।
एस.ओ. नन्दलाल भारती ने बताओ कि एसी कोनऊ बात नई भई हे। सुमन ने एस.पी. खा झूठी दरखास दई हे।