जिला चित्रकूट, ब्लाक मानिकपुर, सामुदायिक स्वास्थ्य केंद्र विकास मोर्चा के मड़ई 18 अगस्त का अनशन करिन। उनके अनशन करै का कारन रहै कि हिंया डाक्टर के कमी हवै। या कारन से मरीजन का समस्यन का सामना करै का परत हवै। उनके मांग हवै कि केंद्र मा डाक्टर के कमी का खतम कीन जाये। यहिके खातिर डी.एम. का ज्ञापन दीन गा हवै।
विकास मोर्चा के अध्यक्ष वरुण गुप्ता का कहब हवै कि केंद्र मा डाक्टर के कमी होय का कारन मरीजन का बहुतै समस्या का सामन करै का परत हवै। यहिसे हमार तीन मांग हवैं पहिली केंद्र मा महिला डाक्टर होय, दूसर मरीजन का देखै खातिर डाक्टर अउर आपात कालीन के समय मा डाक्टर होय का चाही।नही तौ अगर हमार मांग पूर ना होइ तौ हम लोग आमरण अनशन करबे।
केंद्र मा इलाज करवावै आये वाली औरत सियाराम का कहब हवै कि हम औरतन का डाक्टर से आपन समस्या या का बतावै मा बहुतै खराब लागत हवै। यहिसे केंद्र मा महिला डाक्टर होय तौ बहुतै नीक होइ सकत हवै। सरकार कहत हवै कि जननी सुरक्षा योजना के तहत गर्भवती औरतन अउर बच्चा पैदा करवावै वाली औरतन का हर सुविधा मिली। हिंया तौ नीकतान से देखै वाला डाक्टर तक नहीं आय।
विकास मोर्चा का एक मड़ई का कहब हवै कि हिंया बासठ ग्राम पंचायत हवै। रोज का लगभग हजारन के संख्या मा मरीज आवत हवै। औरते महिला डाक्टर ना होय के कारन आपन समस्या का खुल के नही बता सकत हवै। इनतान के गंभीर समस्या का ख़तम करै के जरूरत हवै।
मानिकपुर एस.डी.एम. आर.एस.वर्मा कहिन के ज्ञापन सरकार के लगे भेज दीन गा हवै। सरकार डाक्टर के कमी का पूर कइ सकत हवै।
रिपोर्टर- सुनीता देवी
