जिला चित्रकूट ब्लाक रामनगर का थाना मऊ के एक गांव के मेहरिया आरोप लगाइस हवै कि गांव का कुटटूल, झुल्लूर अउर बच्चीलाल 18 मई के रात वहिका उठाके लइगें हवैं। अउर कुटटूल बलात्कार करिस हवै। लगातार थाना मा शिकायत के बादौ अबै तक कउनौ सुनवाई नहीं भे आय। आरोपी खुलेआम घूमत हवैं।
शिकायतकर्ता बताइस हवै कि मैं रात के खाना खाके दरवाजा बंद करै गई रहौं, तौ वा दीवार के पीछे ओट मा खड़ा रहै। मोहिका झपट के पकड़ लिहिस हवै अउर मुंह दाब लिहिस हवै, जेहिसे मैं चिल्ला नहीं पाय आहूं। मोर मनसवा इलाहाबाद मा मजदूरी करत हवै। फोन कइके बोलाये हौं, जबै मोर मनसवा आगा हवै, तौ मैं हौं अउर आज थाने आई हौं। थाना मा कहत हवै कि तुम गलत करत हौ। तीन दरकी मोरे साथै गलत काम किहिन हवै। जबै मैं मना करों, तबहीने मोहिका कुल्हाड़ी के डंडा से मारत रहे हवै। छोड़े का कहों तब मोहिका कहे कि अगर कउनौ बताइहें तौ तोहिका जान से मार देहू अउर मारिन पीटिन हवै, जेहिके निशान मोरे शरीर मा बने हवैं। तीन मड़इन से मैं कसत जीतों। पहिले से कउनौ रंजिश नहीं रही आय। वहिसे से पूर गांव परेशान हवै वा कहत हवै, कि मैं या गांव का दबंग आहूं। जेहिका पाइस वहिके के साथै जबरजस्ती करत हवै।
पुलिस अधीक्षक मनोज कुमार झा का कहब हवै कि या संबंध मा मुकदमा लिख लीन गा हवै। यहिका तहकीकात करै के बाद दोषी का गिरफ्तार करै का पूरा प्रयास हवै। जाँच कइके कार्यवाही कीन जई।
रिपोर्टर: सुनीता देवी
Published on May 22, 2018
