जिला फैजाबाद, ब्लाक मया, ग्रामसभा टंडौली। हिंआ मनरेगा मजदूरन का तीन साल मा कभौं दुई चार दिन काम मिला रहा। अब बराबर काम मिलै लाग। जेसे मजदूर काफी खुश बाटे। अब उनका बाहर मजदूरी करै न जाए का परे।
मनोज हितलाल भोला प्रसाद बताइन कि टंडौली से राजापुर ग्रामसभा तक दुई किलोमीटर चकरोट के पटाई कै काम हुवत बाय। जबसे यैै प्रधान भइन तबसे पहली बार मनरेगा मा यतना काम मिला बाय। नाहीं तौ बाहर मजदूरी करै जाए का परत रहा।
अरविन्द, छोटेलाल अउर शिवचरन कहिन कि यहि बार जेतना दिन मन करे काम करा। बाकी जब नाली खडन्जा कै काम हुवत रहा तौ एक हफ्ता से ज्यादा काम नाय मिलत रहा। जबकि नियम बाय कि सौ दिन कै रोजगार मिलै। तबौ काम नाय मिलत रहा। वइसे छोटा-मोटा काम नाली खडन्जा कै रहा जवन एकाथ दुई मनई काम करत रहिन।
ग्राम रोजगार सेवक इतियाक अहमद बताइन कि काम मिलत रहा लकिन दुई चार जने कै लियत रहिन। ज्यादा काम नाय रहा। यहि समय दुई महीना लगातार काम होये। हर मजदूर काम करत अहैंै। अउर एक सौ साठ रुपया मजदूरी बाय।
सिकरेट्री राजेन्द्र प्रसाद बताइन कि यहि समय माइनर अउर टंडौली से राजापुर सम्पर्क मार्ग तक चकरोट कै पटाई हुवत बाय। 16 जून से काम शुरू भै बाय। एक महीना लगातार चले।