मनरेगा काम का नहीं मिला रूपिया

जिला बांदा, ब्लाक बड़ोखर खुर्द, गांव दुरेड़ी, मजरा काशीपुर अउर महुआ ब्लाक का गांव रिसौरा। इं दूनौ गांवन के लोग 15 सितंबर का नरैनी अउर बांदा तहसील दिवस मा मजदूरी का भुगतान न होय के शिकायत करिन। एस.डी.एम. उनका कारवाही का भरोसा दिहिन हैं।
दरखास दें मा शामिल विंदा प्रसाद, का जाबकार्ड संख्या 033 है। दुइ साल पहिले मनरेगा से मेड़बंदी वृक्षारोपण, रोड समतलीकरण का काम करिस रहै। लगभग बारह हजार रूपिया नहीं मिला आय। संतोष का कहब है कि वहिकर जाबकार्ड संख्या 091 है। वहिका दस हजार रूपिया नहीं मिला आय। गणेशा अउर राजकरण का कहब है कि प्रधान सिद्वन, पंचायत मित्र देशराज निषाद अउर सचिव मिल के सबका रूपिया निकाल लिहिन हैं। हमरे रूपिया मांगै मा गाली गलौज अउर मारपीट करिन हैं। जान से मारैं के धमकी देत हैं। हम अधिकारिन से मजदूरी दिलावैं अउर प्रधान सचिव पंचायत मित्र के खिलाफ रपट लिखी जाय के मांग कीन हैं। बी.डी.ओ. आर.डी. यादव का कहब है कि दरखास आई है जांच कराई जई। अगर मजदूरी का भुगतान न होई, तौ कारवाही कीन जई।
पंचायत मित्र देशराज निषाद कहत है कि लोग झूठ आरोप लगावत है। कोहू के मजदूरी शेष निहाय। रिसौरा गांव के देवनाथ, रामदीन अउर मनीराम बताइन कि हम लोग जुलाई के महीना मा खंती खोदैं का काम कीन है। रूपिया आज तक नहीं मिला आय।
मनरेगा का काम देखैं वाले जेई का कहब है कि आधार कार्ड फीड कीन जात हैं तौ गांव के मजदूर लोग आधार कार्ड नहीं देत आय। हम लोग तौ ब्लाक मा आय दिन मांग करत हन। 14 सितंबर का ही काम के फाइल जमा करे हौं।