मनमानी से बांटत राशन, बोलै पै दियत गाली

जिला फैजाबाद, ब्लाक मया, ग्रामसभा वनगवां। हिंआ 14 मई 2016 का पूरे गांव कै मनई कोटेदार के मनमानी करै से विपणन अधिकारी के सामने विरोध करिन।
काशीराम, मनीराम, केशपती जयशराज कै कहब बाय कि बीस साल से रघुनाथपुर गांव कै विनोद कुमार तिवारी कोटेदार बाटिन। जवन गल्ला दियै मा घटतौली कराथिन। अगर केहू बोलाथै तौ गरियाय के भगाय दियाथिन। कहाथिन गल्ला न मिले जवन करै का हुवय कै लिया। पांच गांव के बीच चार हजार कै आबादी बाय। जेहमा सारी जनता कोटेदार के मनमानी से ऊबगै बाय। कइव बार जिला पै अप्लीकेशन दियै के बजाय सुनवाई नाय हुवत। घूस दइके कोटा दुसरे के हाथ मा नाय जाय देतिन। 14 मई का नायब तहसीलदार अउर खाद्यय सुरक्षा अधिकारी माला जांच करै आय रहिन तौ कोटेदार पन्द्रह हजार घूस दइके मामला दबाय दिहिन। जांच के बादौ कउनौ ठोस कदम नाय उठावागै।
खाद्यय सुरक्षा अधिनियम अधिकारी माला बताइन कि हम जांच कइके गांव के मनइन कै अप्लीकेशन जमा कै लिहे हई। ऊपर के अधिकारिन का सूचना भेजे हई जैसें आदेश आये कोटेदार कै चुनाव करवाय जाये।