मड़इन से भरा ट्रैक्टर खाईं मा गिरा

लाद के लई जात घायलन का अस्पताल

जिला बांदा, ब्लाक बबेरू, गांव जलालपुर का मजरा गौहारी पुरवा। 29 सितंबर का ड्राइवर से बेकाबू होय मा मड़इन से भरा ट्रैक्टर गौहारी पुरवा के पास खाईं मा कूद गा। दुई मड़इन के मउत दरे मा होइगे अउर बारह जने घायल हैं। सूचना पा के मउके मा पहुंची बबेरू कोतवाली पुलिस सबका एम्बुलेंस से अस्पताल पहुंचाइस है।
घायल उर्मिला अउर निर्मला बताइन कि जिला फतेहपुर, ब्लाक असोथर, गांव कोड़ार, मजरा गोपाली खेड़ा के हम सब एक परिवार के आहिन। बबेरू ब्लाक के गांव बाकल के जोगनी देवी मुंडन अउर मनउती करैं जात रहन। ट्रैक्टर ड्राइवर चुन्नू तेजी से ट्रैक्टर चलावत रहा है। या मारे गाड़ी सधी निहाय अउर खाईं मा चली गे है। सबै सवारी तरे अउर ट्रैक्टर ऊपर होइगा रहै। कउनौ का हाथ टूट तौ कउनौ के गोड़ अउर कउनौ के पूर मा देह चोट के कारन सूझ गे है।
बबेरू कोतवाली पुलिस का कहब है कि हम मउके मा तौ गये हन, पै मड़ई दूसर जिला के आय। या मारे हेंया से कुछ कारवाही नहीं कीन जा सकी। मड़इन का एम्बुलेंस से तिंदवारी सामुदायिक स्वास्थ्य केन्द्र अउर जिला अस्पताल भेज दीन है।