भाकपा के प्रदर्शन से गूंज गा डी.एम. कार्यालय

जिला बांदा। भारतीय कम्यूनिस्ट पार्टी बुन्देलखण्ड मा सूखा अउर वहिसे फइली बेरोजगारी के समस्यन का लइके 23 फरवरी का प्रदर्शन करत राष्ट्रपति के नाम सम्बंधित ज्ञापन सिटी मजिस्ट्रेट का दिहिन। जेहिमा कहिन कि आार्थिक तंगी अउर कर्ज से परेशान किसान आत्म हत्या करैं का मजबूर है। जिले के आधे से ज्यादा लोग रोजगार के तलाश मा महानगरन का पलायन कइ चुके हैं। राहत के नाम मा केन्द्र अउर राज्य सरकार अबै तक दैवीय आपदा से परेशान लोगन का इनतान का कउनौ लाभ नहीं दिहिस है। जेहिसे उंई आपन पेट भर सकैं।
कचहरी के पास या पार्टी प्रदर्शन करिस अउर तरह तरह के नारे लगाइस। जइसे सूखा नहीं अकाल है, बुन्देलखण्ड बेहाल है, केन्द्र अउर राज्य सरकार का वोट नहीं धूल मिली के नारे लगावत डी.एम. कार्यालय गंे। होंआ चित्रकूट के रहैं वाले जिला सचिव कम्यूनिस्ट पार्टी के जिला सचिव अमित यादव कहिन कि बुन्देलखण्ड के स्थिति अन्य क्षेत्रन से बहुतै ज्यादा खराब है। कइयौ साल से दैवीय आपदा झेल रहे किसानन का हाल सूखा से अउर भी खराब होईगा है। केन्द्र अउर राज्य सरकार राहत खातिर ढिंढोरा तौ पीटत हंै, पै होत कुछ निहाय। आर्थिक तंगी के कारन गरीब मजदूर अउर किसान के बच्चन के पढ़ाई अउर शादी विवाह का रुपिया निहाय। जेहिसे तमाम लोग अपने बच्चन का स्कूल से निकाल लिहिन हैं।
सिटी मजिस्ट्रेट आर. के. श्रीवास्तव का कहब है कि जउन भी किसान अउर गरीब लोगन के योजना हैं। उनका लागू कीन जई अउर या ज्ञापन सरकार के लगे जल्दी ही भेजा जई।