बैंक के लापरवाही से मेहरारू कै मउत

जिला फैजाबाद, ब्लाक मया, कस्बा गोसाईगंज क्षेत्र दिलासीगंज। हिंआ सेन्ट्रल बैंक के सामने एक 65 साल कै मेहरारू का बेटवा ठेला पै लैइ कै आय रहिन। शाखा मैनेजर के लापरवाही के कारन धूप मा मेहरारू कै भै मउत। बेटवा राम ओतार बताइन कि हमरे माता जी कै उम्र 65 साल रहा। हम अपने माता सुनरा देवी का 11 अप्रैल 2016 कै दिन मा 10 बजे कै तीस मिनट पै दिलासीगंज सेन्ट्रल बैंक मा लैई कै गए रहेन। हमरे माता जी बिमार रहिन। इलाज की ताई पैसा निकालय गै रहे तबियत ज्यादा खराब होय के कारण माता जी का अन्दर नाय लै जाय सकत रहेन खुले आसमान के नीचे बाहर ठेला पै छोडि़ कै अन्दर मा हम जाय कै बैंक मैनेजर से बहिरे अंगूठा लगवावै कै आग्रह करेन बैंक के प्रबन्धक अउर कर्मचारिन कै व्यस्तता ज्यादा होय से कहिन थोड़ी देर मा चलब। थोड़ी देर कहत-कहत दुई घंटा से ज्यादा होई गै। हम दुबारा जाय कै कर्मचारीन से विनती करेन लकिन केहू नाय सुनिन। तेज धूप मा होय से माता जी कै हालत अउर बिगड़ गै अउर बैंक मा दम तोड़ दिहिन। हालात का देखकै बैंक मा मौजूद मनई हंगामा शुरू कै दिहिन। मौके पै पहूंची पुलिस ने कार्यवायी का अश्वासन दइकै मामला का शान्त कराय गै।
बैंक प्रबन्धक गुंजन शुक्ला बताइन कि वृद्धा बोल-चाल नाय पावत रहिन। यही कारन पइसा का भुगतान नाय कई गै बाय।
गोशाईगंज थाना कै प्रभारी शाह आलम बताइन कि राम औतार के तहरीर पै बैंक प्रबंधक के खिलाफ रिपोर्ट दर्ज कीन गै बाय। मामला कै जांच कीन जात बाय।